Mapua itotodo ang kapit sa top spot | Pilipino Star Ngayon
MANILA, Philippines — Pupuntiryahin ng Mapua University ang ika-10 panalo at ang patuloy na pagdomina sa second round ng NCAA Season 99 men’s basketball tournament.
Sasagupain ng Cardinals ang Lyceum Pirates ngayong alas-4 ng hapon matapos ang bakbakan ng Emilio Aguinaldo College Generals at ng ‘three-peat’ champions Letran Knights sa alas-2 ng hapon sa FilOil Centre sa San Juan City.
Nangunguna ang Mapua bitbit ang 9-2 kartada kasunod ang Lyceum (8-3), Jose Rizal (8-4), San Beda (7-4), St. Benilde (7-4), EAC (6-5), University of Perpetual System DALTA (4-7), San Sebastian (4-8), Arellano (2-9) at Letran (1-10).
Umiskor ang Cardinals ng 69-66 come-from-behind win sa Knights noong Sabado habang nasa two-game winning run ang Pirates matapos mahulog sa tatlong dikit na kamalasan.
Tinakasan ng Mapua ang Lyceum, 87-83, sa first round noong Oktubre 14 tampok ang 20 points, 9 rebounds, 7 assists at 4 steals ni Clint Escamis.
Sa paglusot naman sa Letran ay humataw si Escamis ng 21 points, 2 rebounds, 2 steals at 1 assist.
Humugot ang Pirates ng 81-78 panalo sa EAC kung saan kumamada si Oman Omandac ng 24 points para saluhin ang trabaho ng may sakit na si Enoch Valdez.
“That’s the good thing dito sa team ko. My team is very unpredictable,” ani Lyceum coach Gilbert Malabanan. “Parang lahat ng players ko they are always ready.”
