Karakter susi ng Mapua papasok sa Final Four | Pilipino Star Ngayon

MANILA, Philippines — Sa 69-66 come-from-behind win sa ‘three-peat’ champions Letran noong Sabado ay ipinakita ng Mapua ang kanilang karakter na magagamit nila papasok sa Final Four ng NCAA Season 99 men’s basketball tournament.

Sinandigan ng Cardinals sa nasabing paglusot sa Knights sina veterans Paolo Hernandez, Clint Escamis at Warren Bonifacio.

“Sabi ko nga, ito iyong mga kailangan naming laro, iyong lalabas ang character ng team,” ani coach Randy Alcantara. “Hindi talaga kami puwedeng magpabaya. Iyong mga ganoong sitwasyon ay kailangan naming malampasan.”

Tumapos si Escamis na may 21 points, 2 rebounds, 2 steals at 1 assist habang may 8 at 5 markers sina Bonifacio at Hernandez, ayon sa pagkakasunod.

Rumesbak ang Mapua mula sa 24-35 pagkakabaon sa first half bago inagaw sa Letran ang 67-66 bentahe mula sa undergoal stab ni Jopet Soriano.

Ang mga mintis nina Ira Bataller at Kint Ariar sa panig ng Knights ang nagresulta sa dalawang free throws ni Escamis para selyuhan ang panalo ng Cardinals.

Nauna nang nakatikim ang Mapua ng 61-65 pagkatalo sa St. Benilde makaraang isara ang first round bitbit ang 8-1 record.

Solo ng Mapua ang liderato sa kanilang 9-2 baraha kasunod ang Lyceum (8-3), Jose Rizal (8-4), San Beda (7-4), St. Benilde (7-4), Emilio Aguinaldo College (6-5), University of Perpetual System DALTA (4-7), San Sebastian (4-8), Arellano (2-9) at Letran (1-10).