Biñan Tatak Gel buwenamano ang Caloocan Am Spikers sa MPVA league | Pilipino Star Ngayon

MANILA, Philippines – Umagaw ng pansin ang Biñan Tatak Gel sa kanilang MPVA league debut matapos ang 19-25, 21-25, 25-23, 25-22, 15-10 pagtakas sa Caloocan AM Spikers kahapon sa Strike Gym sa Bacoor City, Cavite.

Tumipa si Diorelle Singh ng 25 points mula sa 22 attacks, 1 block at 2 aces para sa 1-0 kartada ng Biñan Tatak Gel.

Ito naman ang ikalawang kabiguan ng Caloocan AM Spikers sa tatlong laban.

Nakatakdang labanan ng Biñan Tatak Gel ang Bacoor City Strikers nga­yong alas-6 ng gabi sa parehong venue.

Matapos kunin ng Caloocan AM Spikers ang first set, 25-19 at second set, 25-21, ay bumangon ang Biñan Tatak Gel sa third frame, 25-23.

Nakatabla ang Biñan Tatak Gel sa 2-2 mula sa 25-22 panalo sa fourth set na pumuwersa sa Caloocan AM Spikers sa fifth set.

Sumasakay sa dalawang sunod na ratsada, tuluyan nang inagaw ng Biñan Tatak Gel ang panalo sa fifth frame, 15-10, laban sa Caloocan AM Spikers.

Ang MPVA ay inihahandog ng Xtreme appliances katuwang ang Mikasa, ang official ball, ASICS, ang official shoes, at XIV, ang official uniform ng MPVA. 

Mapapanood ang mga laro ng MPVA sa PLUS Network at MPTV sa Cignal Channel 98 at sa Pilipinas Live app.