Boaters Unlimited Fourth Edition kasado na | Banat
CEBU, Philippines — Natapos na ang taas nga panahong pagpaabot, mosikad na ang Boaters Unlimited Cebu Fishing Tournament Fourth Edition sugod ugmang adlawa, Biyernes Mayo 17 hangtud Mayo 19, 2024.
Kapin 100 ka mga anglers gikan sa Sugbu, ubang mga probinsya ug mga langyaw ang magkompetinsya niining talagsaong matang sa paugnat sa kusog dinhi sa nasud, ang sport fishing.
Ang tournament anha pagahimuon sa JPark Island Resort sa Barangay Maribago, Lapu-Lapu City, inabagan sa Department of Tourism, Lapu-Lapu City Government, WinZir ug 25 ka mga sponsors.
Ang una ug ikaduhang hugna sa BU tourneys anha himoa sa maong resort apan sa miaging tuig didto kini gihimo sa Cebu Yacht Club.
Apil sa gipaabot nga mosalmot sa kompetisyon mao si kanhi PBA-legend Ramon “El Presidente” Fernandez. Pipila lamang ang nakahibalo nga si Fernandez, kinsa kanhi PBA-MVP ug karon kasamtangang commissioner sa Philippine Sports Commission mahiligon sab sa pagpamasol.
Dunay mga langyaw nga gipaabot nga mangapil sama sa us aka Koreano nga makig-uban sa lokal nga team gikan sa Cebu Southwest Anglers Club.
Bisan og gibahig sila ngadto sa teams, ang pagpili sa mananaog gibasi sa kun kinsa nga angler ang pinaka bug-at og kuha.
Gawas sa mga mananaog, duna say espesyal nga premyo ang mga anglers nga pinakadaghan og kuha, longest catch, toothy catch, colorful catch ug rare-specie catch.
Ang pamaagi sa pagpamasol mahimong pinaagi sa jigging, casting, trolling, popping o bait and wait.
Gidili ang pagkuha og iho, pagi ug tanang matang sa isda nga protektado o gidili sa mga balaod sa Pilipinas, kinahanglang ibalik kini dayun sa dagat.
Sa miaging tuig, ang nagkamperyon sa 3rd Cebu BU Tournament, mao ang angler gikan sa Iligan City nga Don Zaldivar sa Team Iligan Anglers Club pinaagi sa iyang 12.55 kgs Dogtooth Tuna (Bongkalisan). Mabuak kaha niya ang iyang rekord karong tuiga?
Ang tournament anha buhaton sa kadagatan palibot sa isla sa Mactan island gikan sa Lapu-Lapu City, Cordova , Olango Island ug Caubian Islands.
Ang Caubian Islands – maoy nag-inusarang double barrier reef sa Pilipinas ug usa sa unom lamang ka double-barrier reefs sa kalibutan, ug nabantog nga abunda sa isda dinh sa nasud.
Kag
