Cong. Duke Frasco Cup mosikad na karong Sabado didto sa Liloan | Banat

CEBU, Philippines — Ang ikatulong leg sa Congressman Duke Frasco 5th District Cup 2024 gikatakdang mosikad sa alas-8 sa buntag karong Sabado, Mayo 18, didto sa Panphil B. Frasco Sports Complex sa Liloan, Cebu.

Magpinaksitay sa natad sa basketball ug volleyball, ang kaluhang torneyo gituyo aron pagbaid sa abilidad sa mga batan-ong atleta sa ikalimang distrito sa Sugbo.

Ang mga partisipante nagagikan sa dakbayan sa Danao ug sa mga lungsod sa Borbon, Carmen, Catmon, Compostela, Liloan, Pilar, Poro, San Francisco, Sogod, ug Tudela.

Sila si Liloan councilor Kath Jumapao, Ian Callet, ug Jover Pisao nagtambayayong aron pagpadagan sa maong kalihukan.

Ang makampiyon sa basketball ug volleyball parehong makadawat og P150,000 nga ganting salapi, samtang ang mopahiluna sa ikaduha ngadto sa ikaupat nga dapit mobulsa og P100,000, P75,000, ug P30,000.

Sa miaging tuig, ang Catmon Mighty Bakers maoy nanghawod sa volleyball, samtang ang Carmen Super Niños misakmit sa korona sa basketball.