Cone huhulma ng palaban na Gilas Pilipinas lineup | Pilipino Star Ngayon

MANILA, Philippines — Target ni Gilas Pilipinas head coach Tim Cone na manatiling intact ang 12 players na pinangalanan ng Samahang Basketbol ng Pilipinas (SBP) na isasabak sa iba’t ibang international events.

Ito ang gustong mangyari ni Cone matapos itong italaga bilang head coach ng Gilas.

Iisang team lamang ang ipadadala sa mga windows ng FIBA events gayundin sa Southeast Asian Games, Asian Games at iba pang torneong lalahukan ng Gilas.

“This team is going to stay together through every window. If we play Southeast Asian Games, we expect to play this team in the Southeast Asian Games. If we play Asian Games, World Cup qualifiers, FIBA Cup, Fiba Cup qualifiers, (we play this team),” ani Cone.

Kasama sa lineup ang mga bagitong players na sina Kai Sotto, AJ Edu, Dwight Ramos at Carl Tamayo gayundin si UAAP Season 86 Most Valuable Player Kevin Quiambao ng De La Salle University.

Pasok din ang anim na PBA players na sina seven-time league MVP June Mar Fajardo at CJ Perez ng San Miguel Beer, Scottie Thompson at Jamie Malonzo ng Barangay Ginebra, Chris Newsome ng Meralco, at Calvin Oftana ng Talk ’N Text.

Nakalagay din ang pangalan ni naturalized player Justin Brownlee subalit nakabinbin pa ang paglalaro nito dahil nakaabang pa ang lahat sa magiging desisyon ng FIBA.

“As we are saying, we want to keep this team intact because every time we either grow from the success or failure that we have,” ani Cone.

Iniiwasan ni Cone na mangyari ang mga nakalipas na sistema kung saan bumubuo lamang ng team ang Pilipinas ilang buwan bago ang torneong lalahukan nito.