HD Spikers lusot sa thunderbelles | Pilipino Star Ngayon
MANILA, Philippines — Tinakasan ng Cignal HD ang ZUS Coffee, 25-18, 29-27, 21-25, 25-22, para sa ikalawang dikit na panalo sa Pool B ng 2024 Premier Volleyball League (PVL) Reinforced Conference kahapon sa Philsports Arena sa Pasig City.
Bumanat si Venezuelan import MJ Perez ng 30 points mula sa 26 attacks, tatlong service aces at isang block para sa 2-0 record ng HD Spikers.
Nagdagdag si Ces Molina ng 16 markers tampok ang 10 hits habang may tig-11 points sina Riri Meneses at Jacqueline Acuña.
“Siyempre, happy kami na nanalo kami today, but then ang dami naming lapses na dapat naming i-work on,” wika ni Molina. “Dapat magawa pa namin sa training.”
May 21 excellens sets si Gel Cayuna at nag-ambag si Judith Abil ng 10 excellent digs at 10 excellent receptions para sa kanilang depensa.
Bagsak ang Thunderbelles sa 0-2 marka at nabangasan ng kamador nang magkaroon ng left ankle injury si Jade Gentapa sa first set.
Matapos kunin ng Cignal ang 2-0 bentahe ay naagaw ng ZUS Coffee ang third set, 25-21.
Sa fourth frame ay nagawa ng Thunderbelles na makadikit sa 22-23 mula sa 13-16 agwat sa HD Spikers.
Ngunit ginamit ng Cignal ang kanilang eksperyensa para kunin ang panalo tampok ang back-to-back hits ng 32-anyos na si Perez.
Sa ikalawang laro, hinataw ng Akari ang pangalawang dikit na ratsada matapos ungusan ang Choco Mucho, 18-25, 16-25, 25-21, 25-23, 15-13.
Kumamada si American import Oly Okaro ng 38 points sa likod ng 33 attacks, tatlong aces at dalawang blocks para sa 2-0 record ng Chargers na nagmula sa four-set win sa Capital1 Solar Spikers noong Hulyo 18.
Tumipa si Grethcel Soltones ng 12 markers.