Homeboys Nexgen kampiyon sa Randall Cup 2024 Summer League | Banat
CEBU, Philippines — Ang Homeboys Basketball ni Christopher "Toper” Rey Caruana inabagan sa Hustle Hard ug PaulHewson TV malampuson nga mipahigayon sa 2024 nga edisyon sa tinuig nilang Randall Cup Summer League agig paghandum sa nagtukod sa ilang liga nga si Randall Joseph Prado niadtong Mayo 25 didto sa Cebu Eastern College (CEC) covered court.
Ang Homeboys Nexgen ni Noel Genimo maoy milugwa nga kampiyon human gibuntog ang Eannice side ni Vince Castro, 89-82, sa tinagakay nilang final match.
Nindot ug pisikal kaayo ang ilang kumbati bisan pa man og wala pa pipila ka mga sinaligan sa Eannice.
Si Christian “Assassin” Diaz sa Homeboys Nexgen ang gibayaw nga Most Valuable Player (MVP) tungod sa dalaygon niyang salida sa tibuok nga bahin sa torneyo.
Sa laing bahin, ang Homeboys Original ni Kenny Ferrer milupig sa Underdogs ni Webster “Tatskie” Ong, 86-81, aron pagpahiluna sa ikatulong dapit.