Inter-BPO playoffs Dyninno, Wipro abante sa ikaduhang hugna | Banat

CEBU, Philippines —  Ang Dyninno Jets ug Wipro Tigers mitagak sa tagsa-tagsa nila ka mga karibal aron pag-abante sa ikaduhang hugna sa playoffs sa Hoop Nation Inter-BPO Basketball League nga gipalyuohan sa Hype Pro Cebu didto sa City Sports Club-Cebu gym.

Si James Mabano mirehistro og double-double uban ang 18 puntos ug 10 ka rebounds nga iyang gidungagan og duha ka blocks sa dihang gipalagpot sa Jets ang Keuhne+Nagel, 58-52.

Mihimo sab og kasikas si Jam Ferraren bitbit ng 22 puntos, siyam ka rebounds ug usa ka assist sa dihang gipabakwit sa Tigers ang Tech Mahindra Cebu Rockstars pinaagi sa sikit nga desisyon, 65-63.

Sa laing bahin, ang Real Page Alphas ug ang SVC Bulldogs naka-angkon pa og laing kinabuhi human gipakuratan ang twice-to-beat nilang mga kaatbang.

Si Reggy Sultan mihipos og 11 puntos, unom ka rebounds, usa ka assist ug usa ka block sa dihang gipaksit sa Alphas ang Iploy OPC, 64-45, samtang si Aristotle Alcos mikimada og 16 puntos, pito ka rebounds, ug tulo ka assists sa dihang gipaak sa Bulldogs ang Conduent, 58-51, aron pagpuwersa og tinagakay nga duwa karong Domingo, Oktubre 29.