P20 matag kilo sa bugas humay ibaligya sa kalungsoran sa probinsiya | Banat

CEBU, Philippines — Mga Sugbuanon naghinam-hinam sa P20 matag kilo sa bugas humay diin mahatagan na kini og katumanan sa Lalawigan sa Sugbo ang labing unang probinsiya sa nasud nga mohimo niini.

Sa pakighinabi sa Banat News/DyRF1215 kang Jongjong Oros, taga Lungsod sa Aloguinsan kinsa nagtrabaho isip panday dinhi sa Dakbayan sa Sugbo nipadayag kini nga dako na kaayo kini og tabang alang sa mga kabus.

Gibutyag ni Oros nga ang iyang kita igo ra kaayo sa panginahanglanon sa iyang pamilya ug barato nga presyo sa bugas dako na kaayo kining tabang kanila.

Susama usab niini ang sentimento sa pipila ka mga trabahante sa siyudad nga nanguli sa ilang tagsa-tagsa ka probinsiya kagahapon diin ilang gihangop ug gipaabot ang pagpatuman na sa pagbaligya sa tag P20 nga kilo sa bugas humay.

Ang maong programa mahatagan kini og katumanan pinaagi sa Sugbo Merkado Barato Program sa probinsiya.

Ang maong programa suportado kini sa Department of Agriculture ug National Food Authority diin nigahin ang Kapitolyo ug P100 milyones nga ipalit ug liboan ka sakong bugas humay.

Dili hinuon bulto ang pagpalit og bugas sa NFA diin depende kini sa stock apan nisaad ang NFA nga hatagan og priority ang maong programa sa Probinsiya sa Sugbo.

Matud ni Governor Gwendiolyn Garcia nga target nilang mapatuman ang maong programa sa dili pa matapos ang buwan sa Nobiyembre karong tuiga.

Iapod-apod kini sa 51 ka LGU diin maoy mo-validate sa mga indigent families nga mabaligyaan og tag lima ka kilong bugas humay kada semana ang matag pamilya. (BANAT NEWS)