Lancers, Panthers milansang sa ikaduhang daog sa CESAFI | Banat

CEBU, Philippines — Ang defending champion University of the Visayas (UV) Green Lancers ug ang University of Southern Philippines Foundation (USPF) Panthers nagpabiling way pilde human sa duha ka duwa sa 23rd Cebu Schools Athletic Foundation, Inc. (CESAFI) men's basketball tournament sa Cebu Coliseum.

Ang Lancers ni coach Gary Cortes miihaw sa Cebu Institute of Technology-University (CIT-U) Wildcats, 90-60, samtang ang Panthers, ubos sa paggiya ni coach Alan Cabatingan, mipaksit sa Southwestern University (SWU)-Phinma Cobras 61-52, aron pagposte sa og 2-0 nga baraha sa college division.

Si Albert John "AJ" Sacayan miposa og unom ka tres sa iyang 22 puntos, ang 16 niini iyang gibubo sa first half nga nakahatag sa Lancers og dakong 51-22 nga labaw sa halftime.Sa katapusang kuwarter, si Ivo Salarda na ang misalida diin siya mihabwa og 12 sa iyang 18 puntos aron tabangan ang Lancers pagsilyo sa 30 puntos nilang demolisyon sa Wildcats nga misukarap sa ikatulo nilang pilde.

Sa juniors level, ang managsoong koponan gikan sa University of Cebu (UC) padayong miratsada.

Si Kian Luchavez mikadlit og 24 puntos sa dihang ang UC Lapu-Lapu and Mandaue (UCLM) ni coach Calib Gawangon mipatigbabaw batok sa Cebu Eastern College (CEC) Blue Dragons, 69-54, sa sangka tali sa way pildeng mga puwersa.

Miamot si Kyle de la Torre og 15 puntos samtang sila si Revo Lao ug Geo Rey Lumagod nagkumboya'g 23 puntos alang sa UCLM, nga mipahugot sa ilang pagkupot sa solong liderato bitbit ang perpektong 4-0 rekord.

Sa laing bahin, sila si Lourdonie Cuyos ug Lord Ryan Tinajora mibahug og 14 puntos matag usa sa dihang ang UC Baby Webmasters ni coach Joever "Brad" Samonte miinat sa mainit nilang ratsada ngadto sa tulo ka duwa human gilampornas ang University of San Carlos (USC) Baby Warriors, 65-37.