Magtutudlo vs estudyante: Paul Joven makig-atbang sa kanhi coach niyang si Mike Reyes | Banat

CEBU, Philippines — Ang University of San Carlos (USC) Warriors naglaraw sa ikatulo nilang daog sa dihang ilang harongon ang Southwestern University (SWU)-Phinma Cobras sa Cebu Schools Athletic Foundation, Inc. (CESAFI) Season 23 Men's Basketball Tournament karong adlawa didto sa Cebu Coliseum.

Apan labaw sa pagpahugot sa ilang pagkupot sa ikalimang dapit sa college division standings uban ang 2-1 rekord, si USC head coach Paul Joven  gibati og tumang kahinam nga maka-atbang si Mike Reyes, ang coach sa  SWU-Phinma nga usa sa gitamod niyang mga magtutudlo.

Si Joven, nga usa sa labing hait nga point guards sa CESAFI atol sa ilang panahon isip varsity player sa USC, miduwa sa Warriors sud sa lima ka tuig ubos sa paggiya nilang Reyes ug coach Jay Ramirez gikan niadtong 2005 ngadto sa 2009. Sa wala pa kana, nagsilbe siyang  USC reserve player sud sa duha ka tuig (2003-2004) ubos ni Ramirez.

Uban si Warriors, gisaw-an nilang ug Joven ug Reyes ang dili mahikalimtan nga kaagi.

Niadtong 2005, miabante sila sa CESAFI Final Four sa unang higayon sud sa 20 ka tuig.

Human niini, nasentro sila sa labing init ug labing kulbahinam nga engkuwentro sa kampiyonato sa kasayayan sa liga batok sa gamhanang University of the Visayas (UV) Green Lancers niadtong 2006 ug 2007.

Ang Warriors, nga gipangulohan sa dekalibreng kombinasyon nilang Enrico John Llanto ug Nino Ramirez uban ni Joven isip ilang lider sa korte, napakyas sa maong duha ka finals nga milanat og deciding games apan nakakuha sila og respeto ug pagdayeg gikan sa mga fans tungod sa gipakita nilang katakos ug kaisog.

Si Joven migahin sa katapusan niyang duha ka tuig pinaagi sa pagtabang sa Carolinians nga mopahiluna sa ikatulong dapit niadtong 2008 ug 2009 seasons.

Karon, si Joven naghinam-hinam nga makabangga ang giyukboan niyang coach nga si Reyes nga dako kaayo og impluwensiya sa iyang karera.

"The way I understand the game and fell in love with it is because of coach Mike (Reyes) and coach Jay (Ramirez)," matud pa ni Joven, nga usa na sab karon ka notadong sports analyst ug commentator. "I'm excited and always proud to be mentored by them."

"But never was in my plan coaching USC. It was God's plan," dugang pa ni Joven.