Online seller ng pekeng PhilHealth ID, timbog | Pang-Masa

MANILA, Philippines — Isang 42-anyos na ginang ang arestado dahil sa pagbebenta umano ng mga pekeng PhilHealth identification cards sa online sa Quezon City kahapon ng umaga.

Nahaharap sa kasong paglabag sa Article 172 (Falsification of Public Documents) ng RPC na may kaugnayan sa Sec. 6 of RA 10175 (Cybercrime Prevention Act of 2012) ang suspek na si Maria Trinidad Sabaldo De Castro, 42, housewife, ng No. 5 P. Pelaez St., Brgy. Villa Maria Clara Project. 4, Quezon City.

Lumilitaw na inireklamo si De Castro ng isang Michael Saraspi Ani, 45, Special Investigator 2 at kinatawan ng PhilHealth.

Sa report ng Quezon City Police District (QCPD), bandang  alas-10:45 ng umaga kahapon nang isagawa ang entrapment operation laban sa suspek sa harap ng Watsons Pharmacy sa No. 21st Ave., Brgy. Tagumpay P. Tuazon Blvd. sa lungsod.

Sa imbestigasyon ni Pat Ivan Jared Rivera, ng Project. 4, Police Station (PS 8), inaresto ang suspek sa entrapment operation ng magkasanib na mga operatiba ng   Northern District Anti-Cybercrime Team (NDACT) sa pangunguna ni PLt. Kim Maverick I Tumpalan, asst. team leader na si PCpt. Santiago A Roy, kasama ang mga tauhan ng QC District Anti-Cybercrime Team  sa pamumuno ni PMaj. Eric C Casabal, sa pangangasiwa ni PCol. Jay D Guillermo ng Regional Anti-Cybercrime Unit 2  at mga tauhan ng PS 8 ng QCPD sa pangunguna ni PLt. Col. Jake P Barilla.

Nag-ugat ang operasyon matapos na makatanggap ng mga reklamo ang PhilHealth hinggil sa paglaganap online selling ng umano’y mga pekeng PhilHealth IDs.