SHAABAA Season 27 mosikad na karon | Banat

CEBU, Philippines — Sugdan dayon sa Nest Workspaces Batch 2013 ang pagdepensa sa ilang titulo sa dihang ang ika-27 nga season sa Sacred Heart Ateneo Alumni Basketball Athletic Association (SHAABAA) mosikad na karong adlaw uban ang siyam ka duwa didto sa Magis Eagles Arena sa Sacred Heart School-Ateneo de Cebu (SHS-AdC) didto sa Barangay Canduman, dakbayan sa Mandaue.

Sa dili pa kumbati sa korte, usa ka simpleng seremonyas sa pagbukas ang ipahigayon nga pagasugdan pinaagi sa tradisyonal nga parada sa mga entranteng koponan sa alas-10 sa buntag.

Gipaabot nga motambong sa maong kalihukan sila si SHAABAA Chairman Afshin Ghassemi, President Lloyd Jeffrey Atillo, ug Commissioner Atty. Boyet Velez. Mo-arangkada dayon ang aksiyon diin ang Batch 2009 makigharong sa Batch 2011 ug ang 2KCares.Org mosakbang sa Yangtze Ice sa pasiunang mga duwa sa ala-1 sa hapon.

Pagasundan kini sa laing double-header sa alas 2:30 sa hapon diin ang Batch 2004 makigtige sa Batch 2005 ug Core Pacific Group makigsangka sa GMall of Cebu.   Sa alas-4 sa hapon, ang Batch 2013 magsugod pagpanalipod sa ilang korona sa Division C batok sa Batch 2014, samtang ang Batch 2006 makig-engkwentro sa Batch 2010. Ang Batch 2023 mo-debut sa liga batok sa Batch 2018 sa alas 5:30 sa hapon samtang ang Batch 2021 makigpinaksitay sa Batch 2020. Sa nag-inusarang bugno sa alas-7 sa gabii, ang pinakabata nga partisipante nga Batch 2024 bunyagan og kayo sa SHAABAA batok sa Batch 2022.