Tatum sinakyan ng Celtics sa panalo laban sa Knicks | Pilipino Star Ngayon

BOSTON — Iniskor ni Jayson Tatum ang 17 sa kanyang 35 points sa fourth quarter para gabayan ang Celtics sa 114-98 paggupo sa New York Knicks.

Nagdagdag si Jaylen Brown ng 22 points at may 21 markers si Kristaps Por­zingis para sa Boston (8-2).

Naglista si guard Jalen Brunson ng 26 points at nag-ambag si Julius Ran­dle ng 25 markers sa panig ng New York (5-5) na nag­laro na wala si RJ Barrett (migraine headache).

Matapos imintis ang pito sa una niyang walong tirada sa three-point line ay ipinasok ni Tatum ang apat na su­nod na triple kasama ang isang four-point play para sa 95-88 abante ng Celtics sa dulo ng fourth period.

Ang tres ni Jrue Holiday ang tuluyan nang nagbaon sa Knicks sa 98-88.

Sa Milwaukee, nagpos­te si forward Giannis Anteto­kounmpo ng 35 points at 11 rebounds para banderahan ang Bucks (6-4) sa 118-109 pagsuwag sa Chicago Bulls (4-7).

Nagsumite si Bobby Portis, Jr. ng mga career-highs 19 points at 10 rebounds, habang may 13 at 12 markers sina Khris Middleton at Damian Lillard, ayon sa pagkakasunod, pa­ra sa panalo ng Milwaukee.

Sa Sacramento, humataw si De’Aaron Fox ng 28 points para igiya ang Kings (5-4) sa 132-120 pagpapabagsak sa Cleveland Cavaliers (4-6).

Hindi nakalaro si Fox ng dalawang linggo dahil sa ankle injury.

Sa Toronto, kumayod si Pascal Siakam ng 39 points sa 111-107 pagtakas ng Raptors (5-5) sa Washington Wizards (2-8).

Tumipa si Kyle Kuzma ng season-high 34 points para sa Wizards.