Alyssa Valdez masaya sa opening win ng Creamline | Pilipino Star Ngayon
MANILA, Philippines — Maagang nagparamdam ng lakas ang Creamline sa opening day ng Premier Volleyball League (PVL) Second All-Filipino Conference noong Linggo sa Smart Araneta Coliseum.
Lutang na lutang ang lalim ng lineup ng Cool Smashers nang kubrahin nito ang 25-18, 25-16, 24-26, 25-21 panalo laban sa Choco Mucho.
Hindi naglaro sina middle blocker Ced Domingo at libero Kyla Atienza habang limitado rin ang playing time nina team captain Alyssa Valdez at MVP Tots Carlos.
Kaya naman umarangkada si reserve outside hitter Bernadeth Pons na humataw ng 22 puntos at 11 digs.
“I think to add to coach Sherwin’s thoughts, I think that’s what makes our team different this conference, it’s very unpredictable. We don’t know who’s going to play because everyone deserves a spot on the team,” ani Valdez.
Nagtala lamang si Valdez ng apat na puntos at apat na receptions.
Subalit naramdaman din ang puwersa ni opposite spiker Michele Gumabao na bumanat ng 20 puntos habang nagdagdag si Jema Galanza ng 11 points at 15 digs.
“I think that’s the beauty of the Cool Smashers and everyone’s really stepping up whenever they’re being fielded in by coach Sherwin. So, I guess that’s a good problem for coach Sherwin and hopefully that would be our advantage this conference,” dagdag ni Valdez.
