Pinoy hataw ng 5 ginto sa APG | Pilipino Star Ngayon

MANILA, Philippines – Humakot pa ang national para athletes ng limang gintong medalya sa 4th Asian Para Games na pormal nang nagtapos kahapon sa Hangzhou, China.

Nagdagdag ng gintong medalya si national master Darry Bernardo sa men’s individual rapid VI (visual impairment) B2/B3 event kung saan naungusan nito sina silver medalist Gayuh Satrio ng Indonesia at bronze medalist Kishan Gangolli ng India.

Nakipagsanib-puwersa si Bernardo kina Menandro Redor at Arman Subaste sa pagkopo ng gintong medalya sa men’s team rapid VI-B2/B3 event.

Tinalo ng Pinoy trio ang Indonesian at Indian teams na nagkasya sa pilak at tanso, ayon sa pagkakasunod.

Nauna nang nakaginto sina Bernardo, Redor at Subaste sa team standard VI-B2/B3 event.

Nagdagdag naman ng gintong medalya si Henry Roger Lopez sa men’s individual rapid P1 event matapos paumbahin sina silver medalist Abolfazl Aski ng Iran at bronze medalist Tirto ng Indonesia.

Kasama ni Lopez sina International Chess Federation (FIDE) Master Sander Severino at Arena Grand Master Jasper Rom sa pagsikwat  ng gintong medalya sa team standard P1.

Una nang nakasiguro si Lopez ng dalawang pilak sa men’s individual standard P1 at men’s team standard personal impairment (PI).

Nagparamdam naman ng lakas si Cheyzer Mendoza na kumana ng ikalawang gintong medalya sa Asian Para Games.

Nangibabaw si Mendoza sa women’s individual rapid PI event kung saan tinalo nito sina Indonesians Lilis Herna Yulia at Nasip Farta Simanja na nagkasya sa pilak at tanso.

Noong Huwebes, umani si Mendoza ng ginto sa Individual Standard PI event.

May pilak pa si Mendoza sa team rapid PI kasama sina , Cheryl Angot at Jean-Lee Nacita.

Sa kabuuan, may 10 gintong medalya na ang Pilipinas sa Asian Para Games.

Bukod pa rito ang apat na pilak at limang tansong medalya.