DBM, NHCP, PCG nagsanib-puwersa sa paglulunsad ng outreach program para sa mga estudyante sa Tawi-Tawi

DBM PRESS RELEASE
08 November 2023

DBM, NHCP, PCG nagsanib-puwersa sa paglulunsad ng outreach program para sa mga estudyante sa Tawi-Tawi

Naging katuwang ng Department of Budget and Management (DBM) ang National Historical Commission of the Philippines (NHCP), at Philippine Coast Guard (PCG) sa pamamahagi ng school supplies sa mga batang estudyante ng Tawi-tawi.

Bahagi ito ng pagdiriwang ng ika-643 anibersaryo ng Sheikh Makhdum Day, kung saan ang naging pinaka-sentrong aktibidad ay ang pagpapasinaya ng Historical Marker ng Sheikh Makhdum Mosque na dinaluhan ni DBM Secretary Amenah F. Pangandaman at ng iba pang opisyal.

“Unang-una po sa mahahalagang programa at prayoridad ng administrasyon ni Pangulong Ferdinand R. Marcos, Jr. ay ang edukasyon at bahagi rin ng ating adbokasiya ay tulungan ang mga bata,” pahayag ni Secretary Pangandaman.

“Bilang Rear Admiral ng Philippine Coast Guard Auxillary din po, ang ganitong outreach program ay bahagi po ng aming layuning tumulong sa kabataan at mga komunidad lalo na sa Mindanao na aking pinanggalingan. Buong-buo po ang aking suporta sa mga hakbangin ng PCGA at ng PCG,” dagdag pa ng kalihim.

Laman ng backpack na ipinamahagi sa mga bata ay papel, lapis, coloring book at coloring pens na kanilang magagamit sa pag-aaral.

Aabot sa 322 na mga bata mula sa munisipalidad ng Simunul, Tawi-Tawi ang nakatanggap ng school supplies. Nauna rito, nagsagawa rin ng outreach program sa bayan ng Sibutu, Tawi-Tawi kung saan ay nasa 361 day care students ang nakatanggap ng school supplies.

Kasama ring namahagi ng school supplies sila DBM Undersecretary Goddes Hope Libiran, Undersecretary Margaux Marie Salcedo, Undersecretary Wilford Will Wong, NHCP Chair Dr. Emmanuel Calario, PCG Captain Christopher Auro, Tawi-Tawi Vice-Governor Al-Syed Sali, Simunul Mayor Wasilah Abdurahman, at Simunul Vice-Mayor Ershad Abdurahman.

###