Fajardo, Holt kokoronahan | Pilipino Star Ngayon

MANILA, Philippines — Kung wala nang ibang mangyayari ay inaasahang magiging pormalidad na lang ang pagtanggap nina June Mar Fajardo ng San Miguel at Stephen Holt ng Barangay Ginebra sa kanilang mga individual trophies sa PBA 48th Season Leo Awards.

Nakatakda ang awarding ceremony ngayong alas-4 ng hapon bago ang pagsisimula ng PBA Season 49 Governors’ Cup sa Smart Araneta Coliseum

Humakot ang 6-foot-10 na si Fajardo ng 42.1 statistical points mula sa mga averages na 17.8 points, league-best 13.4 rebounds, 2.8 assists at 1.7 blocks per game.

Hinirang ang Cebuano giant bilang Best Player of the Conference sa nakaraang Philippine Cup at binanderahan ang Beermen sa pagkopo sa PBA Commissioner’s Cup crown at runner-up finish sa Philippine Cup.

Kasunod ni Fajardo sa MVP race sina bagong Terrafirma center Christian Standhardinger (37.8) at SMB guard CJ Perez (37.4).

Nanguna si Holt, maglalaro ngayon para sa Barangay Ginebra, sa PBA Rookie of the Year derby sa kanyang 34.1sps sa likod ng mga averages na 17.0 points, 6.9 rebounds, 5.5 assists at 1.9 steals suot ang Terrafirma jersey.

Nasa ilalim ng Fil-Am guard sina sina Cade Flores (23.3) ng NorthPort, Adrian Nocum (21.8) ng Rain or Shine at Ken Tuffin (21.5) ng Phoenix.

Bukod sa MVP at ROY awards ay kikilalanin din ang mga bubuo sa Mythical Teams, All-Defensive Team at ang tatanggap sa Most Improved Player at Samboy Lim Sportsmanship award.