JJ Vestra niluwas sa JLT Sorbeteros | Banat

CEBU, Philippines — Nakalabang sa lawod sa kalisdanan ang JLT Sorbeteros ug midaog kini batok sa New Era, 43-40 sa ilang kulbahinam nga duwa sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.

Wala damha nga modaog ang JLT kay biya sila og sayes puntos sa hinapos nga bahin sa fourth quarter, 34-40. Bisan pa niini, ang JLT wala kawad-i sa paglaum ug ang kangitngit gipuliha'g kahayag human si JJ Vestra mitusak og duha ka sunod-sunod nga tres aron maigwalis ang iskor, 40-all sa katapusang 22 segundos sa duwa. May purohan unta nga makuha'g balik ang labaw sa New Era dihang ila ang bola, apan si Jeffrey Formentera gipitohan og travelling violation, duna pa'y pakaping technical foul tungod sa pagsige'g reklamo sa nahabiling 12 segundos.

Ang technical free throw ni Jeffrey Francisco ug perimeter shot ni Vestra maoy nagselyo sa daog sa JLT ni Jack Leonard Tagacanao. Si Vestra mao sab ang best player uban ang 20 puntos, lima ka rebounds ug upat ka assists. Si Johnray Formentera nga mihipos og 10 puntos ang topscorer sa New Era ni Chris Ivan Batitay nga wala pa'y daog sa duha ka duwa ning maong liga nga giorganisar sa Brothers Ball League ubos sa liderato ni Marvin Sillar.

Sa laing aksyon, ang Donling Aircon and Refrigeration Services mipakaging sa Cebu Grand Prix, 57-46.

Gipangulohan ang Donling ni Jessie Sanchez nga mao sab ang best player pinaagi sa iyang 18 puntos, walo ka rebounds ug duha ka assists. Si Ace Despi miamot og 10 puntos sa team ni Romeo 'Don' Quilaton Jr.

Ang Cebu Grand Prix ni Errol Mendoza gipangulohan ni Lucky Mendoza sa iyang 14 puntos, gisundan ni John Wiser Medina nga dunay 12 puntos.