Mag-asawa, 2 anak patay sa sunog sa Las Piñas | Pilipino Star Ngayon

MANILA, Philippines — Apat na katao, kabilang ang mag-asawang senior citizens at mga anak ang nasawi sa sunog na sumiklab sa kanilang bahay, sa Talon Dos, Las Piñas City, madaling araw ng Huwebes.

Batay sa panayam kay Fire Officer 2 Ligaya Valerio, ng Bureau of Fire Protection (BFP) Las Pinas, naki­lala ang mga nasawi na sina Nicanor Isip, 73; maybahay nitong si Ma. Elena Isip. 73; mga anak na sina Michelle Angela 45; Michael Angelo, 35, pawang residente ng Peach St., Camella Homes, Barangay Talon 2, Las Pinas City.

Habang dalawa pa ang iniulat na nasugatan.

Ayon sa ulat, nagsimula ang sunog alas-2:38 ng mada­ling araw nitong Huwebes na umakyat lang sa unang  alarma at naapula alas-4:36 ng umaga.

Tinatayang aabot sa P7.5 milyon ang halaga ng napinsala.

Inaalam pa ang sanhi ng sunog.