Slowmo mibira sa solong liderato sa Arlon Cup Season 3 | Banat

CEBU, Philippines —  Ang Slowmo team mibuntog sa Prayboys, 81-77, alang sa ikawalo nilang daog sa Hoop Nation Arlon Cup Season 3 nga gipaluyohan sa Rock Uniform Solutions didto sa City Sports Club-Cebu gym.

Si Hope Canonigo mipupo og 17 puntos, upat ka rebounds ug duha ka steals alang sa Slowmo nga nagsolo na karon sa liderato uban ang 8-1 rekord.

Sa laing bahin, ang Heat Check mitumba sa Steagh, 66-61, aron pagpabilin sa ikatulong puwesto bitbit ang 7-3 nga marka. Si Aldrin Fernandez maoy nangu sa Heat Check uban ang 16 puntos, lima ka rebounds ug tulo ka assists.

Mipabuto si Dean Padinas og 30 puntos ug 10 ka rebounds apan nakawang ang iyang paningkamot gumikan kay ang Steagh nakatilaw sa ikapito nilang pilde sud sa 10 ka       duwa.

Sa ubang mga resulta, ang Buksquad miinat sa ilang baraha ngadto sa 6-5 human gilampaso ang Mugiwara Pirates, 68-54, samtang ang Young Chiefs of Cebu miposte sa ikaupat nilang daog sa siyam ka duwa human gipayaka ang Yamate Knights, 94-87.

Si Michael Ebonalo miharos og 22 puntos, unom ka rebounds ug duha ka assists alang sa Buksquad samtang si Gio Antigua mipabuhagay og 40 puntos, walo ka rebounds ug duh ka assists alang sa Young Chiefs.