Artera Builders mipayaka sa Rongcales | Banat
CEBU, Philippines — Ang eksplosibong triangulo nilang Rumar Ponce, Jeff Michael Gudes, ug Ukinz de los Santos mikuha og atensiyon sa dihang gipiog sa Artera Builders ang Rongcales, 70-67, sa sangka tali sa way pildeng mga koponan sa Mandaue s Pride Basketball Association (MPBA) Season 2:Cebuano Cup didto sa Cebu Port Authority (CPA) gym niadtong weekend.
Si Ponce mitali og 19 puntos, si Gudes mihipos og 18 puntos ug unom ka rebounds, samtang si De los Santos miharos og 17 puntos, 14 ka rebounds ug lima ka assists alang sa Artera, nga mipahugot sa ilang pagkupot sa solong liderato sa North Conference uban ang perpektong 5-0 rekord.
Si Mark Monte mitapos uban ang 15 puntos ug 11 ka rebounds samtang sila si Rex Tuazon ug Aji Dimataga nakumboya'g 21 puntos apan way nahimo gumikan kay ang Rongcales naparot sa unang higayon human sa dalaygong 4-0 nga sinugdanan.
Sa laing bugno sa North, sila si Danillo Contado, Coco Astorga ug Mark Quiapo nagkumbinar og 34 puntos sa dihang gilampornas sa TSO & Co. Prayboys ang Steadfast Builders, 78-59, aron paglayat sa ikaupat nga puwesto bitbit ang 3-2 nga baraha.
Sa South Conference, ang Agalon s Garbage Hauler mikastigo sa WJV-HP Real Estate Inc., 93-64, aron pagduyog sa Luigi Bercede-Team Banilad sa ikaduhang dapit sa standings uban ang partehong 4-1 nga marka. Si James Ferraren maoy nangu sa Agalon's uban ang 25 puntos, walo ka rebounds, upat ka assists ug duha ka steals.
Nakakuha siya og igong suporta gikan nilang Jojo Montejo ug Erwin Brigole nga nakatigum og 32 puntos ingon man ni Renren Arsenal nga dunay 10 puntos ug 10 ka rebounds.
Sa laing resulta, si Jerome Barrita mihipos og 17 puntos ug siyam ka rebounds samtang si Ivan Martel mitampo og 10 puntos sa dihang gibugha sa JDCB Ballers ang Home Sourced, 73-54, alang sa ikatulo nilang daog sa lima ka duwa.
