UV Lancers mikadlit sa ikalimang daog | Banat
CEBU, Philippines — Ang defending champion University of the Visayas (UV) Green Lancers milusad og eksplosibong ataki sa sayong bahin sa duwa dayon na ngadto sa pagptikangkang sa Benedicto College Cheetahs, 69-46, aron pagpabiling way pilde sa lima ka duwa sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Sabado sa gabii didto sa Cebu Coliseum.
Si Jim Paul Amistoso mitali og 12 puntos samtang si AJ Sacayan midugang og 10 puntos alang sa Lancers, nga nakigsawo na karon sa liderato sa college division uban sa University of Cebu (UC) Webmasters bitbit ang managsamang 5-0 rekords.
Dominante kaayo ang Lancers nga wala na molingi pa sukad mitagak og makabungog nga bomba, 27-3, sa unang kuwarter nga nakapabarag sa Cheetahs sa nahibiling bahin sa 40 minutos nilang engkwentro.
Sila si Kenneth Babalcon, Kenn Roger Melitante, ug Deu Ric Orgong nagkumboya'g 36 puntos apan nakawang ang ilang paningkamot gumikan kay ang Cheetahs natagak sa 3-3.
Sa laing collegiate match-up, si Winston Bingil mipabuto og 26 puntos aron pangulohan ang University of Southern Philippines Foundation (USPF) Panthers ngadto sa 77-65 nga pagpakaging sa Cebu Institute of Technology-University (CIT-U) Wildcats.
Si Peter Peteros midonar og 10 puntos alang sa Panthers, nga nagpabilin sa ikaupat nga puwesto sa standings uban ang 4-1 nga marka. Ang Wildcats nahagsa sa 1-5.
Sa juniors level, si Judd Kyle Rueda mipupo og 15 puntos samtang sila si JV Oringo ug Ralph Sampan nakatigum og 21 puntos sa dihang gilampornas sa University of San Jose-Recoletos (USJ-R) Baby Jaguars ang University of San Carlos (USC) Baby Warriors, 92-56, aron pahugtan ang ilang pagkupot sa ikaduhang dapit uban ang 4-0 nga marka.
Sa laing bahin, si Ismael Culdora miposte og 13 puntos samtang sila si John De la Torre ug Kenneth Cole nagkumbinar og 15 puntos sa dihang gipayaka sa UV Baby Lancers ang USPF Baby Panthers, 56-48, aron duyogan ang Cebu Eastern College (CEC) Dragons sa ikaupat dapit uban ang parehong 4-2 nga baraha.
