PDEA sinunog P9.1-B halaga ng shabu, marijuana sa Cavite | Pilipino Star Ngayon

MANILA, Philippines — Sinira ng mga operatiba ng Philippine Drug Enforcement Agency (PDEA) ang bilyun-bilyong halaga ng iligal na droga, kabilang na rito ang big-time shabu seizure kamakailan sa Alitagtag, Batangas.

Gamit ang isang "incinerator," winasak ng PDEA ngayong Huwebes ang P9.1 bilyong halaga ng narcotics sa Integrated Waste Management, Inc. (IWMI), Barangay Aguado, Trece Martires City, Cavite.

"The destroyed stockpile of illegal drugs had a total weight of 2,435,619.8626 grams," paliwanag ng PDEA sa isang pahayag.

"Majority of the illegal drugs destroyed were 1,293,934.2149 grams of Methamphetamine Hydrochloride, or Shabu; 720,898.6564 grams of Marijuana; and 359,752.1449 grams of Ephedrine."

Kabilang sa winasak ang nasa 1.2 tonelada ng shabu na nasabat sa isang chekpoint operation noong ika-15 ng Abril sa Barangay Barangay Pinagkurusan, Alitagtag, Batangas.

Ang mga sinunog na droga ay nakumpiska mula sa iba't ibang operasyon ng PDEA, Philippine National Police, National Bureau of Investigation atbp. counterpart law enforcement at military units. Sinasabing "hindi na kailangan" bilang ebidensya sa korte ang mga nabanggit.

Paliwanag pa ng PDEA, agad-agad na sinira ang mga nabanggit dahil sa "mabilis na prosecution at disposition" ng mga kaso.

"The pieces of drug evidence were destroyed through thermal decomposition or thermolysis," sambit pa ng ahensya pagsira nila sa mga nabanggit.

"Exposed to temperatures of over 1,000 degrees centigrade, all dangerous drugs were completely decomposed or broken down, and are impossible to reconstitute."

Una nang tinukoy ng Department of the Interior and Local Government (DILG) ang Canadian na si Thomas Gordon O’Quinn "major player" sa pagpuslit diumano ng bilyun-bilyong halagang shabu shipment sa Batangas.

Kilala rin ang banyaga sa pangalang James Toby Martin, na siyang nahuli ng intelligence operatives ng National Capital Region Police Office, Calabarzon police at Bureau of Immigration sa isang spa sa Tagaytay noong ika-16 ng Mayo.