JMF emosyonal sa 7th MVP award | Pilipino Star Ngayon

MANILA, Philippines — Gumawa ng kasaysayan si San Miguel Beer slotman June Mar Fajardo matapos masungkit ang ikapitong MVP award sa Philippine Basketball Association (PBA).

Nagawa ito ni Fajardo sa kabila ng ilang aberya sa nakalipas na kumperensiya noong 2022-23 season.

Ilang beses itong hindi nakapaglaro sa Commissioner’s Cup matapos sumailalim sa laryngeal fracture procedure na nakuha nito sa laban ng SMB at Rain or Shine noong Oktubre ng nakaraang taon.

Nakabalik ito sa pag­lalaro sa playoffs subalit natalo ang Beermen sa semis kontra sa Bay Area.

Noong Marso, nagtamo naman si Fajardo ng MCL (medial collateral ligament) injury sa kaliwang tuhod sa laro ng San Miguel Beer sa East Asia Super League Champions Week.

Sa kabila ng lahat, nagawa pa rin ni Fajardo na makuha ang MVP award.

“I never expected to be able to come back and play and still compete at this level after my injuries. I had a major injury but still I was able to make it back,” ani Fajardo.

Nais ni Fajardo na ialay ang kanyang tagumpay pangunahin na sa kanyang pamilya lalo na sa kanyang namatay na ina.

“How I wish my parents where here, especially my mother. But I know my mother is happy today with my grandpa. They are they watching and guiding me. I dedicate this achievement to them,” ani Fajardo.

Si Fajardo pa lamang ang player na nakasikwat ng pitong MVP titles sa liga.

Tanging apat na MVP awards lamang ang nakuha nina PBA legends Ramon Fernandez at Alvin Patrimonio.

Naungusan ni Fajardo sa MVP race sina Barangay Ginebra stars Christian Standhardinger at Scottie Thompson at ang katropa nito sa Beermen na si wingman CJ Perez.