Armymen nagdomina sa 2023 ROTC Games National Finals | Pilipino Star Ngayon

MANILA, Philippines – Kabuuang 20 gold, 16 silver at 18 bronze medals ang ibinulsa ng Philippine Army para banderahan ang 2023 ROTC Games National Championships na nagtapos kahapon sa Rizal Memorial Sports Complex sa Malate, Manila.

Humataw ang mga Armymen ng pitong ginto sa arnis event kasama ang dalawa ni Maria LG Mae Ballester ng Rizal Technological University.

Nagdagdag ng tig-isa sina Lolito Bacor Jr., Villamiel Tiongson, Febie Tacda, Kyla Dela Torre at Joana Dela Cruz.

Limang ginto ang sinuntok ng mga Army boxers mula kina Florence Sumpay, Tina Pais, Kristine Grace Marquez, Alfred Deslate at Joel Efondo at may apat sila sa kickboxing galing kina Betty Mae Churping, Kathleen Igualdo, Christopher Manipon at Kristel Grace Llenas.

Pumangalawa ang Navy sa nakuhang 9 golds, 7 silvers at 15 bronzes kasunod ang Air Force na may 2 golds, 8 silvers at 13 bronzes.

Tatlo ang itinakbo ni Adamson University star Kent Francis Jardin para sa mga Navymen sa kanyang mga panalo sa men’s 200 meters, 4x100m at 4x400m relay sa athletics.

Dalawang ginto ang inangkin ng Air Force mula sa kickboxing at sa 4x100m relay bukod sa 7 silvers at 12 bronzes.

Sa 3x3 basketball, dinaig ng Jose Rizal Memorial State University ang University of Cagayan Valley, 20-15, para sa gold at tinalo ng Ramon Magsaysay Memorial College ang Western Institute of Technology, 21-17, para sa bronze.