1st win puntirya ng Converge vs Blackwater | Pilipino Star Ngayon

MANILA, Philippines — Isang balik-import at tatlong bagong mukha ang sasalang sa PBA Season 48 Commissioner’s Cup sa Philsports Arena sa Pasig City.

Muling ipaparada ng Converge si New Zealand player Tom Vodanovich sa pagsagupa sa Blackwater ngayong alas-4 ng hapon kasunod ang pagtutuos ng Meralco at Rain or Shine sa alas-8 ng gabi.

Ang 6-foot-7 na si Vodanovich ang pumalit kay Jamaal Franklin sa playoffs ng nakaraang Governors’ Cup at nagtala ng 39 points at 10 rebounds sa 105-121 pagyukod ng FiberXers sa twice-to-beat San Miguel Beermen sa quarterfinals.

“He’s a good teammate. He’s part of the team. He’s one of the players. He’s not demanding. He knows his role,” ani Converge coach Aldin Ayo. “Hopefully, he’ll be able to really help us.”

Bago ang torneo ay binitawan ng FiberXers sina guards Jeron Teng at Maverick Ahanmisi na maglalaro sa San Miguel at Barangay Ginebra, ayon sa pagkakasunod.

Itatapat ng Blackwater si 6’8 Puerto Rican Chris Ortiz na naglaro sa nakaraang FIBA World Cup at nagtala ng mga ave-rages na 7.2 points at 2.4 rebounds per game.

Samantala, sasandal ang Rain or Shine kay NBA veteran Dajuan Summer na naglaro para sa Detroit Pistons, New Orleans Hornets at LA Clippers.

Makakaharap niya sa panig ng Meralco si Nigerian-American Suleiman Braimoh kapalit ng kanilang original choice na si Feron Hunt.