Tropang Giga, Gin Kings itutuloy ang ratsada | Pilipino Star Ngayon

MANILA, Philippines — Puntirya ng TNT Tropang Giga ang pangatlong sunod na panalo habang ang ikalawang dikit na ratsada ang misyon ng Barangay Ginebra.

Lalabanan ng Tropang Giga ang Meralco Bolts ngayong alas-3 ng hapon kasunod ang upakan ng Gin Kings at Blackwater Bossing sa alas-6:15 ng gabi sa Philsports Arena sa Pasig City.

Matapos matalo sa Magnolia, 102-110, ay humataw ng dalawang sunod na ratsada ang TNT mula sa 101-98 paglusot sa Converge at 133-93 pagbugbog sa Terrafirma para sa 2-1 record.

Tumipa si import Rondae Hollis-Jefferson ng 37 points laban sa Dyip.

“Just to be blunt, nobody can guard Rondae,” ani coach Jojo Lastimosa sa naturalized player ng Jordan. “Even in the World Cup, he was getting his baskets. Much more here in the PBA.”

Nakalasap naman ang Meralco ng 83-93 kabiguan sa San Miguel sa huli nilang laro para sa 2-1 marka.

Samantala, hangad ng Ginebra na masundan ang 107-102 pagdaig sa Rain or Shine sa pagharap sa Blackwater na nahulog sa three-game losing slump.

“Even though they’re not playing well, they battled all the way through and found a way to win. These are the kind of games that you build character with,” sabi ni mentor Tim Cone sa kanyang Gin Kings.

Nakalasap naman ang Bossing ng 106-111 pagkatalo sa Phoenix Fuel Masters.