Armymen sumipa ng 4 golds sa ROTC Games National Finals kickboxing | Pilipino Star Ngayon

MANILA, Philippines – Ibinulsa ng Philippine Army ang apat sa anim na gold medals sa kickboxing  finals ng 2023 ROTC Games National Championships kahapon sa Rizal Memorial Sports Complex.

Pinamunuan ni University of Baguio standout Betty Mae Churping ang arangkada ng mga Armymen nang talunin si Camille Joy Sanchez ng Air Force sa women’s 52kg division.

Dinuplika ito ng kanyang schoolmate na si Kathleen Igualdo na binigo ang Army teammate na si Angelie Musa ng Sibugay Technical Institute sa women’s 56kg class.

Ginamit ni Kristel Grace Llenas ng Quezon City University ang kanyang lakas para sapawan ang mas matangkad na kakamping si Pauline Gallardo sa women’s 60kg.

Dinaig ni Aryman Christopher Manipon ng University of Baguio si Jerome Negapatan ng Navy sa men’s 57kg division.

Inangkin naman nina Ghen-Yan Berdon ng Air Force at Klenov Belo Pacada ng Navy ang ginto sa men’s  60kg at 63.5kg categories, ayon sa pagkakasunod.

Umiskor si Berdon ng Nuevo Zamboanga College ng isang first-round knockout victory kay Mark Christian Ursabia ng Army at ginapi ni Pacada si Lloyd Salva ng Air Force.

Sa esports, sinikwat ng Navy ang gold medal sa Call of Duty: Mobile event.

Sa 3x3 basketball, pinadapa ng University of Cagayan Valley ang Ramon Magsaysay Memorial College, 21-20, at Our Lady of Triumph Institute of Technology-Pagadian, 21-11, sa Ninoy Aquino Stadium.

Panalo rin ang PATTS College of Aeronautics sa Tanauan Institute Inc., 21-17; at ang Jose Rizal Memorial State University kontra sa OLLTC, 21-14.