Chiefs sibak sa Altas | Pilipino Star Ngayon

MANILA, Philippines — Ipinoste ng University of Perpetual System DALTA ang ikalawang dikit na panalo matapos sibakin ang Arellano University, 81-74, sa NCAA Season 99 men’s basketball tournament kahapon sa FilOil Centre sa San Juan City.

Tumipa si Chris Pa­garan ng 21 points, 5 rebounds, 2 steals at 1 block at humakot si Cyrus Nitura ng 13 points, 10 boards, 7 assists at 5 steals para itaas ang baraha ng Altas sa 6-7.

Nalimitahan si team captain Jielo Razon sa apat na puntos kasama ang isang jumper sa nalalabing 20 segundo sa fourth quarter na sumelyo sa kanilang panalo.

“This win is a good thing for us. Magandang motivation going up against San Beda sa Friday, first round we lost to them by two points,” sabi ni coach Myk Saguiguit.

Ito ang ikatlong dikit na kamalasan ng Chiefs para sa 2-11 marka at tuluyan nang sinamahan ang ‘three-peat’ champions Letran Knights (1-12) sa bakasyon.

Kinuha ng Perpetual ang 12-point lead, 44-32, sa halftime patungo sa pagtatayo ng 67-48 kalamangan sa third quarter.

Mula rito ay hindi na nakalapit ang Arellano.

Binanderahan ni big man Mark Omega ang Chiefs sa kanyang 10 points, 4 rebounds, 2 steals at 1 assist.

Samantala, itinakas ng College of St. Benilde ang 84-81 panalo sa Jose Rizal University.

Nagsalpak si Will Gozum ng 27 points para sa 9-4 baraha ng Blazers kumpara sa 8-6 ng Heavy Bombers.