NU pinasolido ang kapit sa No. 2 spot | Pilipino Star Ngayon
MANILA, Philippines — Muling nasilayan ang bangis ng National University matapos nilang sakmalin ang 69-66 panalo kontra Adamson University kahapon sa UAAP Season 86 men’s basketball tournament na nillaro sa UST Quadricentennial Pavilion.
Humugot ng bangis ang Bulldogs kina Kean Baclaan at Jake Figueroa upang lapain ang four-game winning streak at patatagin ang puwesto sa No. 2 spot ng team standings tangan ang 6-1 record.
Kumayod si Baclaan ng 19 points habang 17 ang inambag ni Figueroa para sa Bulldogs na pinalasap sa Soaring Falcons ang pang-apat na talo sa pitong salang.
Matamlay na sinimulan ng NU ang laro kaya naghabol sila ng 11 points, 30-41 sa unang dalawang quarters.
Subalit nag init ang opensa ni Baclaan para simulan ang harurot ng Bulldogs at maagaw ang lamang, 55-54 sa pagtatapos ng third period.
“Pinatunayan ko lang yung worth ko sa team. Pinakita ko lang kung ano yung kaya ko maitulong sa team. Hindi ko naman inisip yung points, kusa lang din dumating.” ani ng second-year guard na si Baclaan. “Parang ngayon lang nangyari sa akin yun limang sunud sunod na three points,”
Dahil sa panalo, malakas na tinapos ng NU ang first round eliminations at nais nilang ipagpatuloy ang pamamayagpag sa second round.
Tumikada si Matt Erolon ng 14 points kasama ang apat three-pointers para sa Adamson.
Samantala, pinataob ng De La Salle University ang University of the East, 83-75 para patatagin ang kapit sa ikatlong puwesto tangan ang 4-3 karta.
