Pirates muling tumabla sa Cardinals sa itaas | Pang-Masa
MANILA, Philippines — Muling sumosyo sa liderato ang Lyceum of the Philippines University matapos talunin ang College of St. Benilde, 84-81, sa NCAA Season 99 men’s basketball tournament kahapon sa FilOil Centre sa San Juan City.
Ang pang-limang sunod na ratsada ng Pirates ang nagtabla sa kanila sa Mapua Cardinals sa ibabaw ng team standings sa magkatulad niang 11-3 record.
Nagwakas naman ang limang dikit na suwerte ng Blazers para sa 8-5 baraha.
Nagsalpak ng dalawang three-point shots si big man Jearlan Omandac, habang ang free throw ni Enoch Valdez ang sumelyo sa panalo ng Lyceum.
“Tiwala sa sarili ko na kahit na puro mintis sa first half, tiwala akong papasok mga tira ko,” sabi ng 6-foot-5 na si Omandac na tumapos na may 9 puntos.
Humataw si Valdez ng 15 points at may 14 at 13 markers sina JM Bravo at John Barba, ayon sa pagkakasunod.
“Our priority is defense. Hindi kami makakashoot kung wala kami stops,” ani coach Gilbert Malabanan.
Binanderahan ni Miguel Oczon ang St. Benilde sa kanyang 19 points, 7 rebounds at 2 assists, habang may 16 at 13 markers sina Ray Carlos at Will Gozum, ayon sa pagkakasalansan.
Nagkaroon ang Blazers ng pagkakataong makapuwersa ng overtime kundi lamang tumalbog ang 3-point attempt ni Prince Carlos sa pagtunog ng final buzzer.
Samantala, pinatumba ng University of Perpetual Help System DALTA ang San Beda University, 61-57.
Ito ang ikatlong dikit na arangkada ng Altas para sa 7-7 record at palakasin ang pag-asa sa Final Four.
Nagposte si Art Roque ng 19 points7 boards at 2 blocks at nagdagdag sina Chris Pagaran at Mark Omega ng 12 at 10 markers, ayon sa pagkakasunod.
Lubog ang Red Lions sa 8-5.