PRC, magpapadala ng 35 Pinoy doctors sa Gaza | Pilipino Star Ngayon

MANILA, Philippines — Magpapadala ang Philippine Red Cross (PRC) ng mga Pinoy doctors sa Gaza.

Sa isang media interview, sinabi ni PRC Chairman at CEO Richard Gordon na nasa proseso na sila nang pagpapadala ng 35 doktor doon at hinihintay na lamang ang pagsasapinal ng kasunduan sa Egyptian Red Crescent.

Sinabi ni Gordon na hindi siya sang-ayon na maitalaga ang mga doktor sa mga Palestinian Hospitals na may underground facilities.

Sa halip ay dapat sa mga standalone camps mai-assign ang mga ito kung saan matutukoy na sila ay bahagi ng Red Cross.

“It is the Palestinian Red Crescent that is in charge there (Gaza) but we are in the process of sending 35 Filipino doctors pending finalization of agreements with the Egyptian Red Crescent. I do not agree that they be assigned to areas such as Palestinian hospitals with underground facilities. I want standalone camps for them where they will be identified as part of the Red Cross,” ani Gordon.

Nabatid na 10 araw matapos na bombahin ng Hamas ang Israel at manguha ng mga bihag noong Oktubre, nanawagan si Gordon ng agarang tugon mula sa international community.

Ipinanukala rin niya ang pagpapadala sa Gaza ng mga barko, military o commercial man, gaya ng mga cruise ships, upang magsilbing hospital ships dahil sa dumaraming bilang ng mga biktima ng giyera.