Red Lions tinapos ang kamalasan | Pang-Masa
MANILA, Philippines — Pinigilan ng San Beda University ang isang two-game losing skid matapos talunin ang Emilio Aguinaldo College, 81-71, sa second round ng NCAA Season 99 men’s basketball tournament kahapon sa FilOil Centre sa San Juan City.
Itinaas ng Red Lions ang kanilang baraha sa 8-4 para patibayin ang tsansa sa Final Four habang nadulas ang Generals sa 7-6.
“Coming into the game, as a team, we just said that we will take it one game at a time for the next seven games,” sabi ni coach Yuri Escueta.
Humakot si Jomel Puno ng double-double na 11 points at 12 rebounds para sa San Beda na naglista ng 17-point lead sa first half.
Ilang beses itong naputol ng EAC, ngunit kinapos sa dulo ng fourth quarter kung saan sila naiwanan sa 63-74 sa huling tatlong minuto ng laro.
Samantala, muling naghati sa liderato ang Lyceum of the Philippines University at Mapua University matapos talunin ang kanilang mga kalaban.
Pinalubog ng Pirates ang sibak nang ‘three-peat’ champions Letran College, 85-79 habang dinagit ng Cardinals ang San Sebastian Stags, 70-63, para sa magkatulad nilang 10-3 record.
