Stags nakasilip ng pag-asa sa semis | Pang-Masa

MANILA, Philippines — Binawian ng San Sebastian College-Recoletos ang ‘three-peat’ champions Letran College, 94-75, sa second round ng NCAA Season 99 men’s basketball tournament kahapon sa FilOil Centre kahapon sa San Juan City.

Ito ang pang-limang panalo ng Stags para sa 5-9 record at makasilip ng pag-asa sa Final Four habang bagsak ang Knights sa ikaanim na dikit na kamalasan para sa 1-13 baraha.

Ang nag-iisang panalo ng Letran ay sa kanilang 86-71 pagdaig sa San Sebastian sa first round noong Oktubre 18.

“Siyempre, one game at a time. Kung may chance pa kami, we’ll do our best in each and every game and to learn from it, iyon lang naman goal namin,” ani coach John Kallos.

Humataw si guard Paeng Are ng career-high 23 points bukod sa 6 assists at 4 rebounds para pamunuan ang Stags at may 21 markers si Rommel Calahat.

Nagdagdag sina Alex Desoyot at Reggz Gabat ng tig-13 points kasunod ang 10 markers ni Tristan Felebrico.

Binanderahan ni Jay Garupil ang Knights sa kanyang 16 points, 6 rebounds at 5 assists.

Kinuha ng Baste ang 51-38 halftime lead bago tuluyang ibaon ang Letran sa 86-57 mula sa triple ni Are sa huling 4:16 minuto ng fourth period.

Samantala, muling sinolo ng Mapua University (11-3) ang liderato matapos ang 83-77 panalo sa Emilio Aguinaldo College (7-7).