EAC, Baste babangon | Pang-Masa
MANILA, Philippines — Mag-uunahan sa pagbangon sa kabiguan ang Emilio Aguinaldo College at San Sebastian College-Recoletos sa pagdribol ng second round ng NCAA Season 99 men’s basketball tournament.
Magtutuos ang Generals at Stags ngayong alas-4 ng hapon matapos ang salpukan ng Jose Rizal Heavy Bombers at Lyceum Pirates sa alas-2 ng hapon sa FilOil Centre sa San Juan City.
Nagmula ang EAC sa 72-86 pagyukod sa San Beda habang natalo ang San Sebastian sa San Beda, 53-76, at sa 71-86, sa kanilang huling dalawang laban.
Pinabagsak ng Stags ang Generals, 86-70, sa first round noong Oktubre 15.
Hawak ng Mapua ang solong liderato sa kanilang 8-1 baraha kasunod ang San Beda (7-2), Jose Rizal (6-3), Lyceum (6-3), Emilio Aguinaldo College (5-4), St. Benilde (5-4), Perpetual (3-6), San Sebastian (3-6), Arellano (1-8) at ‘three-peat’ champions Letran (1-8).
Sa unang laro, pipilitin ng Heavy Bombers na maidiretso sa tatlo ang kanilang ratsada sa pagsagupa sa Pirates na nasa three-game losing skid makaraan ang 6-0 panimula sa torneo.
Huling biniktima ng Jose Rizal ang Arellano tampok ang hinataw na 21 points ni big man Marwin Dionisio, samantalang nakatikim ang Lyceum ng 87-88 double overtime loss sa Jose Rizal sa kanilang unang pagkikita sa first round noong Oktubre 17.
